فلسفة الشتيمة!

من الأول كده...

الكلام ده مش موجه ولا بحاول انظر على خلق الله. .. والكلام للبنات والولاد على حد سواء أنا مابفرقش... مجرد أفكار في بالي قولت أشارك أصدقائي في العالم الافتراضي بيها وندردش لو تحبو.

أنا عارفة ان ناس كتير لما تقرا يمكن تاخد الكلام على نفسها أو تفتكرني باغلط فيهم... لو حد شايف كده بعد ما يخلص قراية يطلع تاني لأول البوست ويقرا المقدمة

ممكن أكلمكوا عن الشتيمة؟ أنا الحقيقة زي أي حد باتضايق واتنرفز وباشتم أكيد... بس أنا عايزة اتكلم عن نوع الشتيمة اللي لا باستخدمه ولا باستحمله... مش فكرة انه بالنسبة لي مرفوض وبس... فكرة كمان إن مالوش معنى الحقيقة...

1- تعالوا نتفق ان الواحد لما بيشتم بيبقى على آخره من اللي قدامه أو اللي معصبه ده عموماً وبيحاول يوصل إحساسه ده من خلال الشتيمة. صح؟ أنا شايفة ان في الحالة دي الشتيمة لازم تكون معبرة عن الفعل أو الصفة اللي تستاهل الشتيمة. يعني بتشتم حد عشان هو غبي... قليل الذوق... غشيم سواقة... مش محترم... انتهازي... ظالم... مفتري... إلخ. صح؟ طيب إيه لازمة ان الشتيمة تبقى عامة (أصله ابن تيييت)... أيوة يعني إيه الرسالة اللي وصلت؟ إيه الحاجة اللي مزعلاك؟ عايز تشتم، خليك دقيق وحدد شتيمة ليها علاقة بالموضوع واتفضل قولها مش حامنعك!

2- الشتيمة اللي بالأهل.. الحقيقة أنا مش فاهمة لو انت متضايق من حد، ايه ذنب أمه وأبوه؟ وأنا هنا باتكلم عن الشتايم اللي بالأهل من أول ابن (دخل اسم حيوان) لحد ابن (دخل كلام قبيح +18)... يعني الأهل دول عملولك إيه؟ توجه شتيمتك ليهم ليه؟ ممكن أهله دول يطلعوا ناس ظراف وكويسين ولو قعدت معاهم تحبهم جداً على فكرة. ممكن يبقوا ماعرفوش يربوا... ساعتها ممكن نقول ان الشخص مش متربي مش هم اللي واللي... بس برضه ممكن قوي يكونوا عملوا اللي عليهم وهو طلع كده برضه.. حدد عايز تشتم مين الأول! 

3- وده ياخدني لشتيمة الأهل اللي بهزار... من كتر ما اللسان خد عليها اتنسى معناها وبقى اللي ترضى انه يتقال عليك بتسيبه يتقال على أهلك. طب انت راضيها لنفسك، سألتهم إذا كانوا هم راضيين يتشتموا على شرف سعادتك؟ تخيل كده... صاحبك واقف قدام أمك أو أبوك (حسب الشتيمة) وشيل كلمة "ابن" أو "بنت" وتخيله وهو بيقولهاله في وشه... يا عمو انت (ادخل لفظ الشتيمة)... بالذمة حتسكتله؟ طب ما انت ساكت أهو! الفكرة بس انك مش واخد بالك الشتيمة معناها إيه!

4- حاجة بقى ودي أنا شايفاها كوميدية بس مقرفة جداً. .. الشتيمة بأجزاء الجسم (راجل أو ست)... لو فكرت قبل ما تشتم وبصيت للشخص وتخيلت جزء الجسم ده حتعرف ان الشتيمة مالهاش معنى... خلينا نسيب الشتايم القبيحة ونختار مثال مفيش منه ضرر.. تخيل نفسك بتقول لحد انت دراع... أو انت صوبع رجل صغير... أو انت عين! أيوة يعني؟ معناها إيه؟ صدقني مش فارقة أي جزء... كده كده مالهاش معنى. لو سمحت شوف شتيمة ليها معنى!

5- آخر حاجة بقى ودي للي بيشتم راجل بانه يشبهه بست أو العكس... طبعاً معنديش أمل في اني اتكلم عن مساواة وتقولولي امشي يا فيمينيست يا بنت مش عارف ايه. .. بس اللي حاقوله... لو انت شايف انك تشتم راجل لما تقوله انه ست... ففيه ست بتتشتم ان يتقالها انها راجل... في الآخر لا دي ولا دي شتيمة ولا عيبة... الاتنين فيهم ناس تستاهل الحرق وناس تستاهل تتشال عالراس

لو خدت الكلام على نفسك أو شايفني باغلط فيك... اطلع تاني لأول البوست واقرا المقدمة