خواطر عن خواطر

أنا زعلانة قوي من ‫#‏أحمد_الشقيري‬. عندي إحساس قوي ان موسم السنة دي من برنامج ‫#‏خواطر‬ ما هو إلا محاولة منه لاحتواء هجوم بني بلده السعوديين وهجوم العرب والمسلمين عليه بتهمة انه في المواسم السابقة كان بيمجد الغرب ويسيء إلى صورة المسلمين والعرب. مع انه كان لما بيشوف حاجات ناجحة في بلد عربية كان بيقول عليها، مش ذنبه انهم مش كتير.

فقرر ييجي السنة دي في #الموسم_العاشر يقول احنا برضه كويسين وهم برضه مش 100% حلوين. ماشي حقك! أكيد عندهم مشاكل برضه، ما هم بشر في الآخر. بس تجيب إحصائيات مغلوطة وتقرن مشاكلهم (اللي انت مبالغ في نسبتها بالإحصائيات المغلوطة أصلاً) ببعدهم عن الدين حتى لو كان الموضوع مالوش دعوة خالص؟ مش موافقة، ومش مبسوطة!

برضه أنا حاديله حجته واقول يمكن الإعداد هو اللي جابله الأرقام وهو مالوش ذنب، بما إني ماعتقدش انه بيجمع المادة العلمية للبرنامج بنفسه، ده شغل إعداد. بس كان لازم يراجع وراهم، أو يجيب ناس ثقة! كده محدش حايصدق أي حاجة تقولها حتى لو صح، بل بالعكس، لما تقول حاجات غلط عشان تبين إن الإسلام هو الحق، والناس تعرف انك بتكدب، هي مش بس حاتشك فيك، دي كمان حتشك في الدين... تبقى فرقت إيه عن بقية الدعاة اللي بينفروا الناس!

ومن ناحية تانية، حاسة ان فيه ناس ما صدقت تفرح فيه ونسيت المجهود الرائع اللي اتعمل على مدار 9 مواسم فاتت. لو شوفت ال9 مواسم اللي قبل كده حتعرف ان الراجل ده كويس بجد، ويمكن فعلاً المرة دي طلعت منه أوت. بس هو مش درويش ولا شايف الآخر على انه الغرب الكافر اللي مضيع نفسه واحنا أحسن منهم 100 مرة، لا هو عارف كويس قوي انهم كويسين وبقاله 9 سنين بيحاول يقنعنا نتعلم منهم! فبرضه ماتزودوهاش في التحامل عالراجل يعني.